حكايات ابن الشهيد

 شعر / عاصم السمان
وسط الميدان
صورة أبو يا معلقة
جنبيها روحة مرفرفة
شوف كآم سنة
ماسك ابويا ع الزناد
أوقف قصادة يبتسم
من غير كلام
وف كل يوم ساعة الضحى
بسرق رغيف
من غير ما امى تحسنى
وأجرى من البيت فى الزحام
أطوى المسافة زى برق الليل
ارجع من البيت للميدان
ارفع رغيفى لحد مايوازى الزناد
وأبوس ايدية
فيشدنى لصدره الحنون
أدية رغيفى
تترسم نظرات عينية
صوته اللى ساكن ف الفؤاد
دايما أعاتبة ..نسيت ضناك
خد يوم أجازة بل ريقنا وأستريح
خليك صريح
لو كنت جاى أنا ها نتظر
مع انه طال الانتظار
فاكر يا ابوى غزل البنات
فاكر العنب
فاكر يابوى أيام زمان
وأنا كنت بلعب عسكري
وأنت الحصان
لما كنت برقص بين أيدك
وتضمنى ضمة حنان
امتى تزورنا يا بطل
وتجيب معاك شنط الكلام
ماهى عايشه كل الآبهات
وسط الصغار
دايما يابوى تسحبى روحى
مع السحاب
وتخدنى فوق حد السما
اسأل عليك ورا كل باب
اسأل عليك عفصة نعالك ف التراب
تلاقينى راجع حد بيتنا بدون جواب
تنزف عينية من التعب
والآ قى امى تضمنى
ومحضرة غز البنات ويا العنب
يرقص فؤادى من الفرح
تمسح جبينى جدتى
وتشدنى..وتهزنى
أنا حاسة بيك انك بطل
بتقول نشيد
وابوك ضناى للوطن
أول شهيد